النفاق الفكري الروحاني !

' خمسة و خميس على عين الحساد ' ، خميسة ، نجمة خماسية ، عوينة .... التناقض المقوض عايشين فيه ، بنادم كيهدر على السطانيزم بحكم أن الله بوحدو للي كيزيد وللا كينقص ، و غير يشوف شي واحد كيتمزك للروك وللا عندو الشعر ، كيخرج فيه ما لذ و طاب من الٱيات التي تدعو إلى رجم و قتل أي واحد كيدعي شي قوة من غير الله ، ولكن بلاتي ، خميسة للي الدري مني كيحل عينيه و هو مشنوق بيها زعما هاديك غادا تكون السبب باش ماتشدش فيه العين ، هي للي غادا تخلي ربي يحفضو ؟ واحد كيصلي و لحيتو مغطية الربع ف وجهو ، غادي و كيدكر الله ، التسبيح و ريحت المسك ، و غادي عند الشيخ ، الشيخ للي كيعطيه المقادير باش يديرهوم ل مراتو حيت دارتليه وللا مابقاتش باغا دير ليه ، كيبدا ب ' بسم الله ' و كيياخد داك شي ، ماشي ساطانيزم هادا ؟ ساطانيزم إسلامي ؟ المرا للي النهار كامل و هي خاشية وجهها ف إقرأ ، و الجمعة تخدم القرآن بالجهد باش يقولو عليها معقولة ، و ماكاتخلي فقهة وللا شوافة وللا شيخ ، و الخطير أن إسم الشواف ولات سميتو الشيخ ، حتا هو عندو اللحية و جلابة و الطقوس ديالو باش كيساعد الناس ... ، شحال من واحد كيخرج مع باب الجامع كيتلاقا صاحبو فالطريق ، جميع أنواع الفواحش اللفظية كاتجبد ، و لكن غير كيقودوها و للي مؤمن فيهم مزيان كيقول ، ' لا حول ولا قوة إلا بالله ' و كيفورماطيو الذنوب ... و كاين للي النهار كامل و هو خاشي يدو ف صيكان عباد الله ، النهار كامل و هو من طوبيس ل طوبيس كيقلب علا الفيكتيم باش يكمل فلوس طريفة ، كيمشي يتحشش و هو كيتمزك ب التيليفون للي أصلا شافرو ، غير كيبدا الآدان كيطفي مزيكة حتا يسالي الٱذان ، بنادم كيسلم وقت للي بغا ، كيسلم فاش كيبغي يشوف بللي ربي راه كيشوف فيه ، النفاق الفكري المقود ، و السميات ديال المحرمات تبدلو ! الصاط نشربو الشراب ؟ الصاط نشطو هاد الليلة ؟ .. الصاط البارح ف الليل حويت فلانة ، البارح ف الليل جبت فلانة عندي للدار ، شفرت اليوم واحد البورطابل مزيان ، اليوم طلعت ڭاميلة مزيانة ... و غادا هاككا ، بنادم كيحلل و كيحرم ب طريقة غير مباشرة ل راسو ، و هادشي حيت بكترت ما ولف دماغو النفاق ف الأفكار ، وللا داكشي تلقائيا ، الإبداع ف النفاق ! و كانديرو الإسقاط ديال داكشي ديالنا علا عباد الله بلا مانعرفو ، حيت حنا ماقادرينش نقادو راسنا ، و نتحاربو معاه ، و هادشي كاين ف كلشي ، أي حاجة ، كانكلمنو الهدرة مزيان ، التصاحيب ماشي حرام ؟ النميمة ؟ الكذوب ؟ الضحك بالجهد ؟ كشف العورة ؟ السلام ب لابيز ؟ السلام ب البوسان ؟ البوسآآآآآن ، مآآح !
نتاقد راسك قبل ماتنتاقد بنادم ، سمي الحوايج ب سميتاهم و تحمل المسؤولية كاملة وللا ماتحملهاش فخطرة ، و إيلا شفتي شي واحد مختالف علك ، على الأقل غايكون صريح مع راسو ، و مايهمش كيفاش يكون ، و قبل ماتشدي إقرأ مسحي روطانا ، و قبل ماتشد التسبيح مسح النمرة ديال الدريات للي عندك ف التيليفون ، و قبل ماتربي الشعر و تصنط للمزيكا ، شري قيتار و عيش مع راسك !

Read More