سوبير مخزن

غبرت شحال على العالم الإفتراضي ، و تقريبا تقطعات العلاقة ديالي مع صحابي باش نعرف شنو واقع ، مع غادي نحل الفيسبوك ، غادي نلقا حملات ' فري كلشي ' ، ' فري الحاقد ' ، و مادازش بزاف حتا عرفت بللي قرقبو على معاد الحاقد ، و تزاد حتا هو ل قائمة المعتقلين السياسيين ، و الحريرة وللات جوج ، الدراري ديال 6أبريل ، و معاذ للي لبقو ليه تهمة التجارة ف الأوراق ديال التيران ، و هادشي خلاني نخرج بللي المخزن المغربي مقود بزاف ، و هاد القوادة صعيب باش تكون مغربية ، القوادة ديال شدو الدراري ف 6 أبريل ، و دابا معاذ الحاقد باش يتلفو بنادم ، شي يمشي مع معاذ و يبقاو الدراري ديال 6 أبريل مهمشين ، و هاككا شتو بنادم ،

و لأي واحد كيدير حملة ، وللا هاشتاغ فاش يتشد شي واحد ، راه مانافعا والو ، واش المخزن حمار زعما ؟ و للا المخزن غادي يتخلع من الهاشتاغ ؟الدراري ديال 6 أبريل تحاكمو، و تحبسوا من بعد شهر ديال التأجيل  الحملات خاصهم يكونو فاش تكون الوقت هانية و نديرو حملات ديال التوعية ديال عباد الله ،و المطالبة بالصراح ديال الدراري ، و النظال راه ماشء ستيل ، فاش ما طرا شي مصيبة كيبدا بنادم يبان ، و يخرج و يعمر وقتو حيت ماعندو مايدار من 2/6 خارج يناضل هو و صاحبتو و يتصورو ، هاد الحزاق مانافع لوالو ، التران  ديال المغرب  خسر ، تفرڭع ، هرب ، للي بغيتي ، هبط لكتامة طير ، وللا مرجان زحف ، وللا التلفازة نعس ، باش يكون الربع نضال و للي بقا تصاور و تصاطيح للا ،  راه عندنا سوبير مخزن ، و خاصنا سوبير شعب ، حاليا عندنا شعب كيخاف من الصداع ، كيخاف يغوت ، كيضرب 100 حساب قبل مايقول لا ، شعب باغي التعادل ، ضربو ، قمعو ، زيد ليه ف كلشي ، و زيد ليه ، و هانية ، خبزة و براد أتاي مكفياه مسكين حتا يمشي عند مولاه ، و هادي هدرا آخرة و سياسة ٱخرة ماغاديش نهدر عليها ..

6أبريل ، معاذ ، و الدراري ، ف السجن ، و المغاربة برا الحبس ، ولكن واش بصح برا الحبس ؟؟

جوج حوايج حرام و عيب يهدر فيها المغربي ، الدين و السياسة ، وللا بجوج ف خطرا ، فهمتيني وللا لا ؟

الحل الوحيد للي يقد ينجح ، هو نتسناو شي برنامج فحال فوطوشوب ، ولكن هادا سميتو موروكوشوب و منو تقدر تزيد وللا تنقص فهاد البلاد ، غير رسم ، فحال هاككا غادي نقد نبرك ف درب كبير ، و نمسح للي يدوز منو ، و فخلال 30 دقيقة غادي نكون مسحت الربع ديال المغاربة للي مصايباهم شوميشة، الربع لاخر غادي نلقاهم حدا العدول ، مشادين و مزينڭين و ريحت الحب و الأفلام التركية كاتعطعط منهم ، و غير غادي يتزوجو... حبيبة صباح الخير ..؛ تفو دينمو على صباح لله ينعل لك الواليدين تفو ... بابا خرجني ليوم ؟ غادي ندي دينمك للصبيطار .. ، و هوما السباب للي خرجو بنادم قابل باش يتحمر و يتشرمل ، بنادم مصلوق مهيء و قابل للأكل و عندو تاريخ الإنتهاء مع أول مرة غادي يشد التيليكوموند ، كلاه الشيطان ... ، شي طلة خفيفة حدا المدارس كاينين شي أساتذة للي كيبردو الغدايد فينا ، حيت جاه الضو غالي ؟ كلنا هاكاك ، حيت زادو ف كلشي ؟ الڭارو حتا هو زادو فيه ربعة دريال ، و مع أول لقاءديالو مع الأستاذ : شنو بغيتي تولي فاش تكبر ؟ ... بغيت نولي طبيب ... غادي تولي طبيب ديال الزبل نتا ،  البرهوش تاع بوك ! و كانسدو عليه فالفرن لمدة سنوات قليلة بإذن الله و كيولي الخليط مشرمل ، و إيلا بغينا كانزيدو عليه الكاراميل ... سكت لدين مك ، أنا حر ، تبيع ؟ هاك و هارا ...

الرجا ، الوداد ، إيرماكس ، كوبرا ، مولاي براهيم ، الحوى ، الدوخة ، موطور ، و أمبي3 مافيهاش الباب ... هادشي للي كيعرف يدير المغربي الحر ، القح ، الزوين ، الدمدومة ، الحمار ، كارميلو واش قتل مهنذ ؟ لا ٱ لمكلخ ، آش جاب كارميلو ل مهنذ ؟ مكلخ تفو ! ، أجي عارف تشي غيفارا ؟ تشي غيفارا أغنية ألقلاوي ، كيقصرها ولد ميلودة بالڭيطار ، مالك مكلخ ؟ تفو ، الرجا خاصها غير وسط الدفاع و تكمل ، ٱش بان لك ؟ مريڭل أصاط ، ولله حتا ذكي ، معلم ... مشا !

كنت فالسابعة ، و كنت كانقرا عند واحد الأستاذ كيقري الرياضيات ، كان حاقد على الوضعية ، و كان عاود ليا واحد النكتة ديال ، واحد خينا مشا للسوق ، لقا واحد كيبيع دماغ ديال مغربي ، و دماغ ديال إسرائيلي ، الدماغ المغربي غلا من الدماغ الإسرائيلي للي رخيص ، حيت المغربي دماغو جديد ماعمرو خدم ' ، و كنت ماحملتوش و ضرباتني النفس ، و لكن دابا عرفتو علاش كان كيهدر ، و حتا أنا ماكرهتش شي دماغ مغربي ندير بيه لاباس  ! !

التغيير ، التغيير ، ا

لتوعية التوعية ، الحرية الحرية ... جون لينون شاف بعيد ، كون كان مغربي كون دخلوه ل صبيطار الحماق ، وكون كان مغربي كون سمعنا

Imagine there's no sick makhzen

It's hard if you try

No 9er3a below us

Above us only mercy

Imagine all the people living in justice

You, you may say i'm a fool

 well I'm not the only one

I hope some day you'll be free

And the cha3b will be as one

و كون لقينا شي هاشتاغ

#free_lennon